Velaquí vos deixo a nota de prensa que me vén de remitir a Asociación de Escritoras e Escritores en Lingua Galega, da que, como sabedes, son membro dende 2008.
Trátase do calendario de actividades da AELG para a celebración do Día de Rosalía de Castro:
A Asociación de Escritoras e Escritores en Lingua Galega (AELG) anima a
cidadanía a agasallar un libro en galego e unha flor no día do nacemento de
Rosalía de Castro.
O 24 de febreiro é o Día de Rosalía, por iso a AELG quere contribuír a que
a súa voz siga a asombrarnos e os seus versos continúen visibelmente vivos.
Para alén das actividades propias, a AELG coorganizará con diversas
institucións e colectivos sociais outros actos de recoñecemento da nosa
escritora fundacional.
A AELG anima a toda a cidadanía a
participar desas actividades.
A Asociación de Escritoras e Escritores en Lingua Galega organizará, como
xa fixo en anos anteriores, un completo programa de actos con motivo da
celebración pública do Día de Rosalía, o vindeiro 24 de febreiro, data do seu
nacemento.
Con este motivo, os actos tentarán proxectar a figura e obra rosaliana nos
diferentes sectores sociais segundo o calendario que segue:
A AELG proporá aos centros do ensino a inclusión nese día de actividades
escolares na súa programación, como lecturas e gravacións audiovisuais por
parte do alumnado, que divulgaremos desde o noso espazo web para darlles
visibilidade social. Asemade, e como iniciativa propia deste ano,
convidarémolos a que a voz rosaliana invada os muros, habilitados para tal
efecto, con vontade de permanencia e os graffiteen.
Domingo 23 de febreiro, ás 12:00, no Panteón de Galegos Ilustres, terá
lugar un acto nacional onde serán lidos poemas da autora, ademais da
realización dunha ofrenda floral.
Finalmente, para o luns 24 proponse a organización de lecturas de poemas de
Rosalía de Castro a partir das sete da tarde nas distintas cidades e vilas, que
poderá ir precedida ou acompañada da lectura dun manifesto que a propia AELG
difundirá previamente.
Rosalía de Castro é a escritora máis representativa da lingua e da
literatura galegas. A publicación do seu libro Cantares Gallegos, o primeiro escrito integramente no noso idioma,
desde a vontade firme e inequívoca do seu significado, sinala o inicio da
restauración do uso escrito do noso idioma e o final de séculos de silencio e
esquecemento.
A súa obra é un retrato do pobo galego e goza dunha total actualidade.
Desde o século XIX Rosalía de Castro foi homenaxeada polas galegas e os galegos
como poeta nacional, pois reclamou a redención da patria galega e asumiu a voz
do seu pobo, voz que guiou permanentemente a súa obra e o seu pensamento. Esta
galeguidade intrínseca dos seus textos, esta comunicación e entendemento
permanente co seu pobo, ao se dirixir a el no seu idioma propio, foi o que a
fixo tamén poeta de todos os pobos, chegando a formar parte da nómina de
escritoras máis destacadas da literatura universal de todos os tempos.
.JPG)
.JPG)
.JPG)
