Graciñas a todos/as por este histórico ano 2015

Non podo máis que agradecer inmensamente a todos/as a confianza que depositáchedes en min este ano 2015. Agardo que sigades nesta "fantástica liña" en 2016 (jeje).

En serio, graciñas de corazón a todas as entidades, tanto públicas como privadas, que contáchedes comigo para presentar eventos, guiar andainas e rutas, ofrecer explicacións, escribir discursos, elaborar artigos, etc.

Especial recoñecemento, dende aquí, ao concello do Rosal, ao de Ponteareas, A Guarda e Oia, ao Club Ciclista O Rosal, ao Acanor Atlético Novás, a Luis Paz e Fáunicas, a Sergio Trinta e o Seixiños, á AELG, a Bluscus, á Experiencia Ecotur e Uniminho, etc, etc. 

Este ano foi un "non parar" -con viaxe dun mes por Canadá e EEUU incluída- pero orgulloso de traballar e dar o máximo pola miña vila do Rosal, polos meus veciños da "Comarca" e polos meus paisanos de Galicia. Aínda que tiven que sacrificar moito tempo de lecer persoal, confésovos que, por suposto, ¡valeu a pena!

Aproveito dende aquí, xa que moitos me preguntáchedes, que precisamente, despois de 3 anos como autónomo, dende o pasado 2015 traballo e facturo como "freelance" (profesional por conta propia do mundo audiovisual, da comunicación e da cultura). 

¡Que pasedes un Feliz 2016, moita saúde e para o que precisedes, aquí estou á vosa disposición! ¡Bicos e apertas para todos/as!

Segue lendo

O libro Tres Feridas preséntase en Ponteareas

Hoxe, xoves 5 de novembro, asistirei con Xoán Martínez Tamuxe á presentación en Ponteareas (Pontevedra) da primeira novela do periodista e escritor, Manrique Fernández Vázquez, que leva por título Tres Feridas.

Convidados por Belagua Ediciones e o Concello de Ponteareas, o acto celebrarase na Biblioteca Municipal (20:30 horas), coa intervención da concelleira de Cultura, Hortensia Bautista, a escritora Susana Lamela e a editora, Edurne Baines. 

Segue lendo

Artigo sobre gravados rupestres en "Soberosum"

Escritores/as, alcalde e concelleiro de Cultura de Ponteareas na presentación. (Foto: Hernández)

Onte, mércores 10 de xuño, fun novamente convidado polo Concello de Ponteareas, desta vez para asistir á presentación de "Soberosum". Revista de Estudos Municipais, na que colaborei literariamente, xunto con Xoán Martínez Tamuxe, co artigo de carácter arqueolóxico titulado "Algúns gravados rupestres en Mouriscados e Uma".

Un pracer e unha honra poder escribir e aportar o meu -o noso- graniño de area a esta publicación ponteareá (a nº 4, de case 400 páxinas), que tamén conta coa firma de recoñecidos investigadores como -entre outros- Clodio González Pérez, Andrés Sampedro Fernández, Estanislao Fernández de la Cigoña Núñez, Francisco Candeira Mosquera, Michael Skinner, etc, etc.

O que digo sempre e me reafirmo cada vez máis: cando "fóra" contan contigo, te tratan de forma exquisita e te invitan a colaborar en libros e revistas desta categoría, un sae deste tipo de actos botando de menos un pouco máis de sensibilidade cultural e respecto preto da casa. 

Está claro que, cando hai interese polo noso, querer é poder. Pero -como di o refrán- de onde non hai... ( )

¡Noraboa ao Concello de Ponteareas!

Segue lendo

A obra eterna de Alfonso Quinteiro Alonso

Velaquí vos deixo íntegro o meu último artigo, titulado Un ponteareán, autor do monumento a Frei Rosendo Salvado, publicado na revista Pregón, presentada hai uns días en Ponteareas (Pontevedra):

O pasado ano conmemorouse na diócese de Tui-Vigo o bicentenario do nacemento de Frei Rosendo Salvado y Rotea (Tui, 1814 – Roma, 1900), misioneiro benedictino, abade e bispo de Nova Nursia (Australia), gran defensor dos dereitos dos aborixes australianos e unha das personalidades galegas máis destacadas do pasado século XIX.

Aproveitando esta sinalada efeméride, é xusto lembrar que a monumental escultura dedicada ao Pai Salvado, na Praza da Inmaculada, en Tui, de máis de cinco metros de altura e dous anos de traballo, foi realizada polo mestre pontareán, Alfonso Quinteiro Alonso. Esta obra, promovida por suscrición nacional en 1946, foi inaugurada tres anos máis tarde.

Non foi ata o ano 2007 cando tiven o pracer de coñecer ao autor   da estatua que lembra a figura de Frei Rosendo Salvado, nun acto que se celebrou precisamente na cidade tudense. En concreto, o luns 4 de xuño, mentres cubría a noticia da homenaxe na memoria do bispo Rosendo Salvado, coa presenza –entre outros- do embaixador de Australia en España, Noel Campbell e o alcalde de Tui, Antonio Feliciano Fernández Rocha.

Dito evento estivera promovido polo colectivo Australia-Spain Business Association –ASBA Galicia, liderado por Barry-Francis McGinlay e o seu obxectivo prioritario era estimular as relacións entre Galicia e Australia.

Guiados así mesmo polo cóengo Avelino Bouzón percorremos xuntos lugares ligados a Frei Rosendo, como foi a súa casa natal, na rúa que leva o seu nome ou tamén a propia catedral de Tui. Un dato curioso é que Rosendo Salvado ven sendo oriundo -por parte de pai- da parroquia de San Bartolomeu das Eiras (O Rosal-Pontevedra).

O colofón desta homenaxe, sen dúbida, foi o descubrimento -a cargo do embaixador australiano- dunha praca na escultura de Quinteiro Alonso que rezaba: “EN GRATITUDE AO TUDENSE FREI ROSENDO SALVADO POLO TRABALLO APOSTÓLICO E O INMENSO LABOR REALIZADO COS ABORIXES AUSTRALIANOS NO CLX ANIVERSARIO DA FUNDACIÓN DE NOVA NURSIA”.

Alí presente, e atento a canto se dicía e facía, estivo o escultor, debuxante e pintor de Ponteareas, Alfonso Quinteiro Alonso (1924-2009), ilustre deseñador das alfombras florais do Corpus Christi da vila e aínda pregoeiro da Festa de 2007.

A figura de Rosendo Salvado está realizada en bronce, sobre un pedestal de granito, completándose o conxunto cuns cisnes e unha muller aborixe amosando unha cruz ao seu fillo, ademais de varias conchas de vieiras en forma de recipiente, rodeados dun fermoso e axardinado estanque.

En maio cumpríronse, pois, seis anos do falecemento de Quinteiro Alonso, pero a súa obra, e en concreto a monumental estatua a Frei Rosendo Salvado, serán, sen dúbida, eternas.

Autoría das imaxes:

Foto 1 e 2: extraídas da páxina web de Alfonso Quinteiro Alonso.

Fotos 3, 4 e 5: Juan Ramón Martínez Barbosa.

BIBLIOGRAFÍA:

Exemplares de Faro de Vigo e La Voz de Galicia.

FREIRÍA, Eduardo. Monumento a Dom Rosendo Salvado. Patrimoniogalego.net.

IGLESIAS ALMEIDA, Ernesto. Xenealoxía do Bispo Salvado. Exposición Frei Rosendo Salvado (1814-1900). O Bispo dos Sen Alma. Tui, 2001.

SÁNCHEZ BARGIELA, Rafael. Lembranzas de Alfonso Quinteiro Alonso. Blog Tudensia,1 de xuño de 2009.

QUINTEIRO ALONSO, Juan José. Web de Alfonso Quinteiro Alonso. Dibujante, escultor, pintor y maestro. 2009.

Segue lendo

Ponteareas defende e difunde o seu patrimonio

Información e fotografías: Concello de Ponteareas

O venres 29 de maio fun convidado polo Concello de Ponteareas ao II Encontro de escritores en lingua galega de temática ponteareá, baixo o lema “A importancia de difundir o local”, que se celebrou no Salón de sesións municipal.

Ademais o convite foi extensivo á presentación da revista internacional Pregón da que colaborei literariamente co artigo titulado "Un ponteareán, autor do monumento a Frei Rosendo Salvado", dedicado ao mestre escultor Alfonso Quinteiro Alonso.

Segundo se pode ler na súa web: "Foi unha xuntanza na que se tratou a importancia que ten para a cultura local a súa divulgación escrita e no que participaron os escritores Clodio González Pérez, Anxo Serafín Porto Ucha, Xoán Martínez Tamuxe, Estanislao Fernández de la Cigoña, Antonio José Groba Diéguez e Sofía Rodríguez Suárez". 

Intervención do escritor rosaleiro Xoán Martínez Tamuxe

Andrés Sampedro Fernández, concelleiro de Cultura do Concello de Ponteareas, "actuou como moderador do debate". O encontro tamén serviu "para brindar unha homenaxe, a título póstumo, a Maruja Pino Piñeiro polo seu seu labor como escritora e divulgadora da nosa cultura, costumes e tradicións".

Un acto moi emotivo -seguimos lendo- que "contou coa presenza da súa filla, Margot, quen recibiu un diploma e unha medalla de parte dos escritores, ademais dun agasallo de mans do alcalde, Salvador González Solla, en nome do Concello". 

Posteriormente, o mesmo salón foi testemuña da presentación da revista Pregón, publicación do Concello de Ponteareas, "que recolle ano tras ano artigos referentes ao Corpus, convertíndose nunha referencia escrita e visual de todas as alfombras confeccionadas o ano anterior e que ten unha ampla difusión non só en Galicia e España, senón tamén alén das nosas fronteiras, como en Uruguai, Arxentina, Cuba, Venezuela, México, etc, onde os nosos ponteareáns que están fóra a gardan ano tras ano como un prezado tesouro". 

O concelleiro de Cultura, Andrés Sampedro Fernández, sinalou a "importancia de escribir e investigar sobre a cultura local". O edil definiu a revista Pregón, ou Revista da Festa do Corpus Christi de Ponteareas, como "unha publicación importantísima para o espallamento da nosa festa do Corpus e, asemade, unha excelente canle de difusión onde estudosos de renome poden plasmar as súas investigacións sobre o Corpus, Ponteareas e a súa comarca, contribuíndo, pois, á difusión de todo tipo de estudos de temática local".

Segue lendo

Lectura do pregón do Corpus de Ponteareas 2014

Solla e Sampedro flanquean a Bargiela. Foto: Concello de Ponteareas

Este sábado 14 de xuño asistín, na compaña do escritor Xoán Martínez Tamuxe, ao acto de lectura do pregón das Festas do Corpus Christi de Ponteareas 2014, que tivo lugar no Auditorio Reveriano Soutullo.

Rafael Sánchez Bargiela, director-xerente da Sociedade Anónima de Xestión do Plan Xacobeo e compañeiro noso do Instituto de Estudos Tudenses, foi o pregoeiro deste ano, facendo un percorrido "polos feitos que foron decisivos para esta Festa".

Coa presenza -entre outros- do alcalde de Ponteareas, Salvador González Solla e do concelleiro de Cultura, Andrés Sampedro, tamén se homenaxeou a figura do fotógrafo José Guillermo Souto, realizándose unha exposición baixo o título "Historia viva de un fotógrafo de calle".

A Festa do Corpus Christi de Ponteareas, que está declarada Festa de Interese Turístico Internacional, contará con multitude de actividades culturais e de lecer ata o luns 23 de xuño.

Segue lendo

Bargiela, pregoeiro do Corpus de Ponteareas

      Nunha intervención en RMT, con José Font, Suso Vila, Tamuxe e Rafael S. Bargiela. (Foto: Nuria Patiño)

Segundo me acaban de comunicar dende a Concellaría de Cultura de Ponteareas, o Corpus Christi 2014 terá como pregoeiro ao amigo e compañeiro do IET, Rafael Sánchez  Bargiela. A lectura do pregón, será, pois, o sábado 14 de xuño, ás 21:30 horas, no Auditorio Reveriano Soutullo. 

Velaquí vos deixo a nota de prensa oficial:

"Natural de Tui, onde nace en 1961, é o actual director-xerente da Sociedade Anónima de Xestión do Plan Xacobeo.

A súa relación co Concello de Ponteareas comeza no ano 1990 cando entra a formar parte como director do Museo, Biblioteca e Arquivo Municipal, ata  marzo de  2006, que se incorpora ao de Tui como Técnico medio de Arquivo, Museo e Biblioteca, ata o seu recente nomeamento como director-xerente da Sociedade Anónima de Xestión do Plan Xacobeo.

Bargiela, no "VIII Congreso Internacional de Molinología, Tui, 2012"

Durante os anos que desenvolve o seu labor en Ponteareas, foi promotor de diversos proxectos culturais sobre a nosa vila e comarca, en xeral, e sobre o Corpus, en particular. Así, foi impulsor do Museo Municipal e do Centro de Recuperación de Cultura Popular, actualmente situado no Castelo de Sobroso; da Rede de Bibliotecas Municipais; da revista Pregón; do Soberosum, ou dos últimos números de Lonxe da terriña.

Historiador e investigador sobre temas ponteareáns e a súa comarca, publicou importantes estudos como “100 años de luz eléctrica en Puenteareas”; “Percorrido pola historia de Ponteareas, imaxes do século XX nas coleccións do Museo Municipal de Ponteareas”, entre outros.

Bargiela, primeiro pola esquerda, nunha reunión do Instituto de Estudios Tudenses

O Corpus Christi ponteareán foi un dos temas máis estudados por Rafael Sánchez Bargiela, sendo moitos os  artigos publicados en revistas de carácter científico, desenvolvendo un labor divulgativo moi importante para o coñecemento da nosa festa máis emblemática. Moitos deles foron publicados na revista de difusión do Corpus Christi “Pregón”. Pódense citar, entre outros, “La fiesta del Corpus Christi en Puenteareas (su origen y evolución)”, en colaboración con Moné Fernández;  “Precedentes de la fiesta del Corpus Christi en Ponteareas”, en colaboración con Moné Fernández; “Los comienzos de las alfombras de flores”, en colaboración con Moné Fernández;“Penlas no Corpus de Ponteareas”; “A beleza das alfombras do Corpus Christi de Ponteareas” ou “As alfombras de flores xa existían no ano 1857”, entre outros.

O seu coñecemento sobre o Corpus Christi ponteareán faino merecedor de representar o Concello de Ponteareas en diversos congresos internacionais de arte efémera, con comunicacións como “La fiesta de Corpus Christi en Ponteareas” en La Orotava (Tenerife) ou “La fiesta del Corpus Christi en Ponteareas: un patrimonio cultural” no III Congreso Internacional de Arte Efémera, celebrado en Ponteareas no ano 2010. Ademais,  o seu coñecemento e labor difusor das nosas tradicións, lévao a colaborar en programas de divulgación histórica en diferentes medios de comunicación".

Segue lendo