Moita arte no III Concurso Antonio Granja 2016

Reportaxe fotográfica: Xesús González (Suso).

O pasado domingo 24 de abril tiven o pracer de presentar no Auditorio Municipal do Rosal a III edición do Concurso de Xoves Intérpretes "Antonio Granja", que, en verdade, amosou arte polos catro costados. 

O certame, organizado pola Agrupación Musical do Rosal que dirixe José Javier Bascoy e preside Iván Diego Martínez, coincidindo co seu 30º Aniversario, estivo aberto por vez primeira -na categoría de máis idade (17 a 23 anos)- a participantes de calquera procedencia. 

O clarinetista vigués Xosé Antón Comesaña foi o gañador desa categoría, conseguindo Juan José López o 2º premio e Sara Pumar, o 3º.

O concurso, dende os seus inicios, "fai homenaxe co seu nome a un dos socios fundadores e principais precursores deste colectivo musical do Baixo Miño".

Actuación do grupo Kla-Son da Agrupación Musical do Rosal

Aparte da contía dos premios (500, 300 e 200 euros), o gañador do Concurso terá nun futuro "a oportunidade de actuar como solista coa Banda da Agrupación". 

Finalmente, e tras unha difícil deliberación debido ao alto nivel de tódolos finalistas, "o xurado decidiu conceder os tres primeiros postos aos xoves músicos arriba mencionados, todos eles da especialidade de clarinete. Na xornada do sábado, os gañadores foron Laura Riveiro Amorín e David Rodríguez Castro (categorías A e B respectivamente), onde tamén obtiveron unha mención especial María Pereira e Uxía Aldea".

Segue lendo

Programa da Festa do Cabaqueiro. O Rosal, 2015

O Rosal celebrará dende o 10 ao 12 de outubro a XXVIII edición da Festa ou Romancha do Cabaqueiro, que coincide anualmente coas Festas da Pilarica.

Tal e como se pode ler no cartel anunciador este será o programa de festexos:

SÁBADO 10 

Baile e música tradicional da bisbarra. A partir das 7 da tarde, organizado polo grupo Do lusco ó fusco con motivo do seu 30 aniversario, no Auditorio Municipal.

DOMINGO 11

Obradoiros para nenos e nenas a partir das 5 da tarde. Ás 22:00 horas, actuación do grupo folk Can de Palleiro na Praza do Calvario (en caso de mal tempo a actuación será no Auditorio Municipal).

LUNS 12

Misa solemne cantada pola Coral da Agrupación Musical do Rosal. A partir das 17:30 horas terá lugar a celebración da XXVIII Festa de lembranza "Os Cabaqueiros" que comezará cun recoñecemento a Xoán Martínez Tamuxe pola súa labor historiadora e investigadora da nosa cultura e coa lectura do pregón a cargo de Antonio Giráldez Lomba, docente e historiador vigués.

Foto: facebook Lirolai

A partir das 19:00 horas, música tradicional co grupo Lirolai e a continuación concerto da Banda da Agrupación Musical do Rosal.

Durante todo o día haberá demostración de oficios tradicionais: palilleiras, cesteiro, tamanqueiro, canteiro...

Igualmente haberá unha exposición de pintura na Sala de exposicións do Concello de Valentín Marín Rodríguez.

Segue lendo

O Rosal celebra o Día das Letras Galegas 2014

O Día das Letras Galegas 2014 está este ano adicado á figura do escritor e poeta Xosé María Díaz Castro. Para conmemorar esta sinalada efeméride, a Agrupación Musical do Rosal, como todos os anos, organiza na Praza do Calvario unha serie de actos músico-culturais e de lecer.

Tal e como reza o cartel oficial do evento, este sábado 17 de maio, haberá tapas e degustación de viños do Rosal durante todo o día, con actuacións e actividades para nenos e adultos.

¡Dende aquí, os meus parabéns á Agrupación Musical da vila que preside o rosaleiro Iván Diego Martínez!

Segue lendo

FESTAS DA SAÚDE E SAN BRAIS EN TABAGÓN

As Festas de 2014 na honra da Virxe da Saúde e San Brais na parroquia rosaleira de San Xoán de Tabagón celebraranse dende o venres 31 de xaneiro ata o luns 3 de febreiro.

Tal e como reza o cartel, o venres, ás 13:00 horas, gran tirada de fogo graneado, con "treboada" ás 16:00 horas.

Xa ás 18:00 horas, Subida do Artístico Arco, con animado ambiente tradicional.

O sábado 1 de febreiro, ás 11:00 horas, entrada do Grupo de Baile Do Lusco ó Fusco. Ás 20:00 horas, presentación das orquestras Gran Parada e Charleston Big Band.

O domingo 2 de febreiro, ás 11:00 horas, fará a súa entrada a Banda de Música da Agrupación Musical do Rosal, ofrecendo pola tarde un concerto. 

Haberá hinchable para nenos/as e chocolate de balde para todos. Unha gran tirada de bombas anunciará o fin da festa.

Segue lendo

XXIV FESTIVAL DE MÚSICOS XOVES NO ROSAL

Segundo comunica a Agrupación Musical do Rosal, esta fin de semana terá lugar na Praza do Calvario o XXIV Festival de Músicos Xoves que se vén celebrando dende o ano 1989.

O sábado 24, a partir das 21,00 h. participarán a Banda Infantil da Agrupación Musical do Rosal, Unión Musical de Ponteledesma, Banda Cultural de Salceda de Caselas e a Agrupación Musical do Rosal

O domingo 25, á mesma hora, estará adicado a música coral e participarán a Coral Polifónica de Baiona A Real, Coro de Cámara Gli Appassionati e a Coral da Agrupación Musical do Rosal.

Segue lendo