Charly López, a pola conquista de Marina d'Or

Moita sorte ao deportista e adestrador goianés Charly "Spartan" López*, competidor profesional de K1 e Kick boxing, que esta fin de semana competirá no "Spain International Open" de artes marciais e deporte de contacto que se celebra en Marina d'Or (Castellón).

Na imaxe, que lle realicei hai uns días, á esquerda, co amigo Sergio Rodríguez "Trinta", xerente do Bodegón-Tapería Os Seixiños e un dos colaboradores con Charly neste evento.

P.D.: Quero revancha dese Celta-Milan jeje. 

¡Moita sorte, campión!

*Charly "Spartan" López. Máis info.

Premios

• -CAMPIÓN GALEGO FULL CONTACT 2009
  
  -CAMPIÓN GALEGO FULL CONTACT 2010
  
  -CAMPIÓN GALEGO KICK BOXING 2012
  
  -SUBCAMPIÓN GALEGO BOXEO 2012
  
  -PRATA CAMPIONATO INTERAUTONÓMICO 2012
  
  -FINALISTA TORNEO FIGHTHERS VS RIGHDERS K1
  
  -2013 ASPIRANTE TÍTULO DO MUNDO.
  
  -2014 PRATA CAMPIONATO INTERAUTONÓMICO

Segue lendo

Coñecer paseando a historia do Baixo Miño

Explicacións nas inmediacións da Ponte do Tamuxe (Foto: Sara Carrera/Infomiño)

Como anunciaba nunha das últimas entradas do meu blog, este sábado 21 de febreiro celebrouse a "1ª Andaina de Santa Cruz a San Lourenzo" (A Guarda-O Rosal-Goián, Tomiño) na que colaborei como guía da vila rosaleira e na que participaron preto de 150 persoas. 

Cun día verdadeiramente ideal para a práctica do deporte e da "camiñada" saíuse dende A Guarda cara O Rosal, previas explicacións históricas no Castelo de Santa Cruz a cargo do amigo especialista Manuel Álvarez Pérez.

Na miña intervención nas inmediacións da Ponte do Tamuxe expliquei que esta construción -polos estudos de diversos autores e arqueólogos- suponse de orixe romana, datando a primeira cita histórica de 1293.

              Comentando a cartela da última construción da ponte. (Foto: Sara Carrera/Infomiño)

Lembrei, así mesmo, que se organizou nesta zona do Tamuxe, no lugar de Pampillón en 1644 un pequeno astaleiro do exército galego. Como curiosidade, cando os galegos tiñan xa construídos 35 barcos, foron sorprendidos polos soldados portugueses, quen incendiaron eses barcos e os seus almacéns de madeira. 

O mal estado da ponte, consecuencia desas guerras que España tivo no século XVII con Portugal por estar inmediata ao río Miño, levou a reparar e inaugurar unha nova construción, tal e como reza a cartela que hai sobre a ponte: “REINANDO DOÑA ISABEL II / SE CONSTRUYO ESTA OBRA / EN BENEFICIO DE LOS PUEBLOS / AÑO DE 1845".

Dende aquí dirixímonos ata Goián e a Fortaleza de San Lourenzo -onde nos esperaba un tercer guía- pola ribeira e polo Sendeiro de Pescadores Río Miño-Tamuxe (PR-G 112), un percorrido de 7'2 km que vai dende o muíño das Aceñas ata a praia de Eiras (e viceversa). 

Pese a que a altísima velocidade que se mantivo durante toda a "andaina" semellaba mesmo unha competición, foron uns 15 km de agradables conversas e de desfrute dunha paisaxe e unha contorna certamente fermosas.

Agardando poder realizar en breve outra andaina ou actividade deportivo-cultural para seguir coñecendo a historia do noso querido Baixo Miño, recibide un cordial saúdo.

¡Bicos e apertas!

Segue lendo

Andaina especial por A Guarda, O Rosal e Tomiño

Na Fortaleza de San Lourenzo (Goián-Tomiño) hai uns anos

Non vos esquezades que o vindeiro sábado 21 de febreiro realizarase unha andaina especial -na que colaborarei como guía por parte da vila do Rosal- que leva por título "De Santa Cruz a San Lourenzo" e que permitirá coñecer estas dúas fortalezas e o seu contorno.

Tal e como se indica na nota de prensa do Departamento de Turismo da Guarda, enviada aos medios de comunicación "trátase dunha ruta interpretativa organizada polos concellos de Tomiño, O Rosal e A Guarda. A andaina contará con tres guías que explicarán tanto a importancia histórica das fortalezas transfronteirizas como o interese natural da ribeira do Miño".

Sendeiro de Pescadores Río Miño-Tamuxe (O Rosal)

"A ruta duns 13 km comeza no Castelo de Santa Cruz (A Guarda) ás 9.30 horas, coas explicacións do guía. Camiñarase cara o barrio da Gándara e a desembocadura do Tamuxe para enlazar coa Senda dos Pescadores no veciño Rosal e continuar pola beira do río ata a fortaleza de San Lourenzo en Goián. A  ruta está previsto que remate ás 14.00 horas".

No Castelo de Santa Cruz (A Guarda) en 2013

Esta andaina -como se lembra- é gratuíta pero precisa inscrición previa porque empregaranse autocares para os traslados dos participantes.

O autobús para os inscritos en Tomiño sairá ás 9:00 horas dende o antigo embarcadoiro de ferry en Goián, despois recollerá aos veciños do Rosal nos puntos indicados e deixará aos participantes no Castelo de Santa Cruz. Aqueles que comecen no castelo disporán dun autocar que os traerá de volta ao concello da Guarda.

Os interesados poden inscribirse ata o luns 16 de febreiro nos concellos organizadores:

A Guarda: 986 61 45 46

O Rosal: 986 62 50 00

Tomiño: 986 62 20 01

Segue lendo

EXPOSICIÓN DE XOÁN PIÑEIRO. TALLER E ARTISTA. ESTE SÁBADO DÍA 13 NA GUARDA

Tal e como se comunica dende a concellaría de Cultura da Guarda e hoxe lembran nas redes sociais escultores como o rosaleiro Julio Martínez Martínez, este sábado 13 de xullo ás 21.00 horas, inaugúrase na Casa dos Alonsos (Praza do Reló) unha exposición dedicada a Xoán Piñeiro.

A mostra, cuxa comisaria será a súa filla, Cuqui Piñeiro, "broncista e herdeira do legado do seu pai dende a Fundición Artebronce (antano taller de Xoán Piñeiro) de Goián", estará aberta ao público ata o 1 de setembro deste ano, de martes a sábado (de 11 a 14 e de 20 a 22 horas) e o domingo (de 11 a 14 horas).

Segue lendo