2016 acollerá a primeira Gala do Libro Galego

Velaquí vos deixo esta moi boa noticia -pode dicirse, histórica- que me foi comunicada recentemente: "Desde hai anos viñan convocándose os premios literarios da AELG (Asociación de Escritores/as en Lingua Galega) coa súa Gala das Letras, a Noite da edición en Galicia da Asociación Galega de Editores e máis os Premios Irmandade do Libro da Federación de Librarías de Galicia. 

A partir de agora todos estes galardóns desaparecen para transformarse nuns únicos premios literarios co libro galego como protagonista principal, convocados de forma conxunta polas tres organizacións. O nome escollido, e que hoxe se presentou publicamente, é Gala do Libro Galego".

Tralo anuncio de colaboración entre as directivas das organizacións convocantes "estes galardóns nacen co obxecto de recoñecer a excelencia do traballo literario realizado no ámbito editorial ao longo do ano 2015 en Galicia, e faranse públicos no transcurso da Gala do Libro Galego 2016, que se celebrará o 14 de maio do próximo ano". Alí entregaranse as distincións nas seguintes categorías: 

Obra de ensaio
Obra de narrativa
Obra infantil e xuvenil
Libro ilustrado
Iniciativa bibliográfica
Obra traducida
Libro de poesía
Libro de teatro
Iniciativa cultural ou fomento da lectura
Proxecto literario na rede
Xornalismo cultural
Escritor galego universal
Premio honorífico á libraría
Premio honorífico á editora 

Arriba, na imaxe, de esquerda a dereita, Mercedes Queixas, secretaria xeral da AELG, Xosé Antón Pedreira, vicepresidente da Federación de Librarías de Galicia, Xosé Leal, vicepresidente da AGE, Cesáreo Sánchez, presidente da AELG e Laura Rodríguez, presidenta da AGE.

Toda a información da Gala do Libro Galego 2016, aquí. 

Segue lendo

Necesaria defensa e difusión da nosa literatura

Pazo da Cultura. (Foto: concello de Pontevedra)

Traballando co grupo nas "novas formas de edición". (Foto Mercedes Queixas Zas)

Tal e como vos comentaba na entrada anterior, o sábado 26 de setembro asistín no Pazo da Cultura da cidade de Pontevedra ao VI Congreso de Escritores/as da AELG, onde analizamos o futuro da lingua e literatura galegas. 

A presentación e benvida á convención correu a cargo de Anxos Riveiro (concelleira de Cultura), Mercedes Queixas Zas (secretaria xeral da AELG) e Cesáreo Sánchez Iglesias (presidente da AELG).

Presentación do VI Congreso de Escritores

Os grupos de traballo nos que participei foron os seguintes:

–Dereitos de autoría e profesionalización (coordinado por Francisco Castro). 

– Novas formas de edición (Rosalía Fernández Rial).

– Formación de lectores/as (Ledicia Costas).

Foto: Asociación de Escritores/as en Lingua Galega (AELG)

Despois de 7 anos como membro da AELG por fin puiden estar presente cos meus compañeiros nun simposio desta categoría e importancia para analizar "Para que(n) escribimos o futuro".

Dende aquí un cordial saúdo -entre outros- a Ernesto E. Calo e a Jorge Emilio Bóveda, así como a todos os compañeiros/as da AELG por estas animadas e proveitosas xornadas, que sen dúbida serán un punto de inflexión para ese "futuro" da literatura galega. 

O que teño claro é que entre todos/as temos que loitar pola necesaria defensa e difusión do "galego". Como podedes imaxinar, se non apreciamos e valoramos o noso, mal imos. 

Este é un avance das propostas e conclusións do VI Congreso de Escritores/as da AELG.

¡Unha forte aperta para todos/as!

Segue lendo

A HOMENAXE "A ESCRITORA NA SÚA TERRA" DA AELG RECAE ESTE ANO EN MARICA CAMPO

Marica Campo. (Foto: Baía Edicións)

A Homenaxe A Escritora na súa Terra, impulsada pola Asociación de Escritoras e Escritores en Lingua Galega (AELG), da que son membro dende o 2008, "chega este ano á súa XIX edición recaendo, por decisión unánime da súa Asemblea de Socios e Socias, na figura de Marica Campo, que será homenaxeada na súa terra natal, o Val do Mao".

Segundo lembra a AELG, "esta iniciativa anual conforma xa unha tradición na traxectoria da Asociación, e tense constituído ao longo de case dúas décadas como unha celebración na que a terra de orixe da homenaxeada cobra un protagonismo fundamental. 

É vontade da AELG honrar escritores/as procurando o contacto directo co autor/a e a súa implicación persoal na xornada de homenaxe. Unha celebración múltiple e popular na que se vén recoñecendo a entidade literaria de insignes figuras das nosas letras, a través dunha serie de eventos como a entrega do galardón Letra E de escritor/a (unha peza escultórica asinada por un/ha recoñecido/a artista galego/a, neste caso Silverio Rivas), a plantación dunha árbore simbólica (unha camelia elixida pola propia autora), a colocación dun monólito conmemorativo e a atribución do nome do homenaxeado a un espazo público, neste caso ao Campo da Festa-Souto Marica Campo".

O vindeiro sábado 15 de xuño ás 11:30 horas, na  Praza da Casa do Concello do Incio (A Cruz do Incio), terá lugar o acto de entrega da Letra E, coa intervención de:

• Laura Celeiro García, Alcaldesa do Incio

• Mercedes Queixas Zas, Secretaria Xeral da AELG

• Cesáreo Sánchez Iglesias, Presidente da AELG

• Xosé Ramón Freixeiro Mato. Laudatio

Entrega da peza escultórica de Silverio Rivas.

• Intervención da homenaxeada: resposta á laudatio por parte de Marica Campo.

Ás 13:00 horas, no Campo da Festa-Souto Marica Campo (Val do Mao), plantación da camelia (árbore simbólica da escritora) e descubrimento do Monólito conmemorativo e da placa que atribúe o nome da homenaxeada ao Souto.

Interveñen:

• Cesáreo Sánchez Iglesias, Presidente da AELG

• Marica Campo.

Finalizará a homenaxe cun xantar de confraternidade, aberto a Socios/as da AELG, á veciñanza do Incio e demais persoas interesadas.

Segue lendo