Homenaxe ao poeta Francisco Álvarez "Koki"

O Centro Cultural e Social da vila da Guarda, en Pontevedra, acolle este venres 5 de xuño (21:00 horas) unha homenaxe ao escritor e poeta, Francisco Álvarez Álvarez "Koki", con motivo do Día das Letras Galegas 2015.

Tal e como podemos ler en Infogauda "A Agrupación Cultural Guardesa vén de facer público o programa de actos para a celebración do Día das Letras Galegas de 2015, que este ano, a nivel institucional, está adicado a Xosé Filgueira Valverde, e na Guarda, a Francisco Álvarez Álvarez (Koki)".

Máis información sobre o homenaxeado, neste artigo da autoría do xornalista guardés Ricardo Rodríguez Vicente, coordinador de Infogauda.

Segue lendo

Presentación do novo libro de J. Miguel Villa

O Centro Cultural da vila da Guarda acollerá o vindeiro venres 24 de outubro ás 20:30 horas, a presentación do novo libro de Joaquín Miguel Villa Álvarez, que leva por título: La Sociedad Pro-Monte Santa Tecla (2ª parte: 1928-1939). El Patronato del Monte Santa Tecla.

Trátase pois da continuación da obra inicial publicada fai dez anos: La Sociedad Pro-Monte Santa Tecla (1ª parte: 1912-1928). La presidencia del indiano puertorriqueño Manuel Lomba Peña.

Miguel Villa, que foi o meu profesor no Bacharelato Unificado Polivalente (B.U.P.), naceu en A Guarda en 1967. É Doutor en Historia Contemporánea pola USC, especialista na emigración galega a Puerto Rico e República Dominicana, ademais de autor de diferentes e recoñecidos libros sobre asociacionismo ou historia relixiosa.

Tal e como sinala Villa, esta nova publicación "es el número cinco de la serie de monografías históricas titulada Las sociedades de A Guarda y su comarca que iniciamos en 1997 con dos objetivos principales: avanzar y profundizar en el conocimiento de nuestra historia (tan rica como sorprendente), y que ese conocimiento nos ayude a entender mejor el presente y nos oriente en nuestras actuaciones futuras".

O libro, que ten máis de 400 páxinas e 256 imaxes, é froito dunha "amplia y minuciosa investigación" en arquivos locais, provinciais e aínda nacionais. Igualmente foi posible grazas ao estudo e revisión de infinidade de documentos e, por suposto, á información oral e entrevistas realizadas por este incansable autor.

¡Dende aquí, Villa, a miña máis sincera noraboa!

Segue lendo

Homenaxe na Guarda a Generoso Álvarez Seoane

A activa Agrupación Cultural Guardesa homenaxeará a Generoso Álvarez Seoane, Doutor en Ciencias Químicas e Licenciado en Farmacia pola USC, con motivo das Letras Galegas 2014.

A cita, este xoves 5 de xuño ás 21:00 horas no Centro Cultural da Guarda, falando sobre o galardoado, Constantino Peón Amor.

Durante o evento actuarán o grupo de pandeiretas da A.C.G., dirixido pola rosaleira Berta Castro; o grupo Antorcha, a cargo de María José Baz e a Coral da Terceira Idade, dirixida polo amigo David González Sobrino.

Máis información en Infogauda.

Segue lendo

CONFERENCIA MAXISTRAL DE XESÚS ALONSO MONTERO NO CENTRO CULTURAL DA GUARDA

Antonio Lomba, Freitas, Alonso Montero e Paco Vidal nun momento da conferencia

Tal e como xa vos contara nunha entrada anterior, o pasado venres 3 de xaneiro asistín na Guarda á conferencia ofrecida por Xesús Alonso Montero, presidente da Real Academia Galega, con motivo da clausura da exposición Libros, Códices e Documentos. Galicia, España e Portugal.

Na mesa principal estivo acompañado polo promotor e artífice desta mostra, Paco Vidal; polo concelleiro de cultura, Antonio Lomba e polo alcalde guardés, José Manuel Domínguez Freitas. 

Ao remate do acto, os representantes do Concello entregáronlle aos oradores (entre os que estaba tamén Bieito Ledo, á esquerda da imaxe), sendos agasallos de lembranza da vila da Guarda.

Un pracer o volver a escoitar en "plena acción" a Xesús Alonso Montero, gran amigo en común do meu lembrado e finado profesor Xosé Carlos Gómez Alfaro.

Segue lendo

XESÚS ALONSO MONTERO (RAG) OFRECE UNHA CONFERENCIA NA VILA DA GUARDA

Hoxe, venres 3 de xaneiro, ás 20:00 horas, terá lugar no Centro Cultural da Guarda unha conferencia a cargo de Xesús Alonso Montero, presidente da Real Academia Galega, con motivo da clausura da exposición "Libros, Códices e Documentos".

Segundo se afirma dende o Departamento de Cultura guardés, "a conferencia versará sobre o contido dos libros aquí expostos, entre os que destacan o Códice Calixtino e as Cantigas de Santa María, primeira obra escrita en galego-portugués".

Outras obras destacadas son "o Atlas de Ptolomeo ou o Beato de Girona, dicionarios histórico-económicos como o de Pascual Madoz ou a Descrición Económica do Reino de Galicia, nos que atopamos referencias á Guarda do século XIX, unha biografía de Carlos V ou de Cristóbal Colón".

Tampouco faltan "referencias á bibliografía lusa, pois tamén podemos atopar un exemplar de Os Luisiadas ou do Códice Foral de Mira".

Segue lendo

CONFERENCIA DO ESCRITOR BIEITO LEDO E EXPOSICIÓN DE LIBROS ANTIGOS NA GUARDA

Paco Vidal, Domínguez Freitas, Bieito Ledo e Antonio Lomba na inauguración da mostra

A semana pasada, en concreto o xoves 28 de novembro, asistín con Xoán Martínez Tamuxe á inauguración da mostra Libros, Códices e Documentos. Galicia, España e Portugal, que se celebrou no Centro Cultural da Guarda.

Alí fomos partícipes da entretida conferencia que ofreceu Bieito Ledo, escritor e director de "Ir Indo", que estivo acompañado na mesa principal polo gran promotor da exposición, o bibliófilo Paco Vidal, así como polo alcalde José Manuel Domínguez Freitas e o concelleiro de Cultura guardés, Antonio Lomba.

O experto Paco Vidal explicando as características dos diferentes libros e documentos

Tal e como reza o cartel, a mostra estará aberta ata o vindeiro venres 3 de xaneiro, data na que terá lugar unha nova conferencia -de clausura- a cargo de Xesús Alonso Montero, presidente da Real Academia Galega.

Segue lendo

A AELG CELEBRA UNHA POLAFÍA EN FINGOI (LUGO) TRAS O SEU PASO POR A GUARDA

Segundo me comunican dende a Asociación de Escritores en Lingua Galega, este venres 29 de novembro celebrarase no Centro de Convivencia de Fingoi (Lugo) a vixésimo sexta edición das Polafías, un proxecto da súa Sección de Literatura de Tradición Oral. 

Nesta ocasión, conta co patrocinio da Área de Cultura e Turismo da Deputación de Lugo, levando por título "Historias, rimas, cantos, contos..."

Antonio Reigosa presentando a Polafía na vila da Guarda. (Foto: Galiciasuroeste.info)

Para este acto a AELG conta coa colaboración de Paco Martín (escritor), Toño Núñez (escritor e profesor), Dictino Rodríguez Lázare (exfutbolista), Isidoro Rodríguez (dinamizador da cultura popular), Marcelino Castro Pena (narrador), Ana Mª Gómez Pérez (narradora) e de Isidro Novo (recitador).

O evento estará amenizado musicalmente pola Agrupación Xeada, Pepa Yáñez e Branca Villares, o Grupo de Pandeiretas da Asociación Cultural Son de Cores (Becerreá) e Os Minhotos.

Imaxe dos asistentes á Polafía celebrada no Centro Cultural da Guarda. (Foto: Galiciasuroeste.info)

Teño que lembrar que o pasado ano 2012, tamén neste mes de novembro, en concreto o día 16, celebrouse no Centro Cultural da Guarda unha "Interesante, enriquecedora e divertida Polafía", coordinada por Antonio Reigosa Carreiras, responsable da Sección de Literatura Oral da Asociación de Escritores en Lingua Galega.

Segue lendo