"Tomiño Romano" inaugúrase en Compostela

Segundo se pode ler na web da Universidade de Santiago de Compostela, mañá xoves 4 de febreiro, inaugúrase na Igrexa da USC a exposición "Tomiño Romano: o xacemento de Currás", resultado da primeira fase dos traballos arqueolóxicos realizados en 2013.

Gómez Sobrino, González Santiso e Martínez Tamuxe en Currás (1972)

Hai que lembrar que esta vila romana dos Medos, en San Martiño de Currás, no concello de Tomiño (Pontevedra) foi descuberta en 1972 polo Equipo Arqueolóxico do Baixo Miño, formado por Jesús Gómez Sobrino, Aquilino González Santiso e Xoán Martínez Tamuxe.

Os resultados daquela campaña de 1972: descubrimento da vila co seu hipocausto (sistema romano de calefacción) e a súa necrópole (cemiterio primitivo, xa cristiano) foron recollidos en parte na prensa e, singularmente, na memoria das mesmas publicada na revista Tuy - Museo y Archivo Histórico Diocesano. I (Tui, 1975).

Tras a exposición á que asistimos na Casa de Cultura de Tomiño en outubro de 2014 é agora a quenda da inauguración desta mostra en Santiago de Compostela, ás 13.00 horas "nun acto no que participarán a vicerreitora de  Estudantes, Cultura e Responsabilidade Social, Dolores Álvarez; a concelleira de Cultura e Asuntos Sociais de Tomiño, Cristina Martínez; os comisarios da mostra, Fermín Pérez e Silvia González; o decano da Facultade de Xeografía e Historia da USC, Juan Monterroso; e a decana da de Historia da UVigo, Susana Reboreda". 

Lémbrase dende a Universidade de Santiago que a mostra ‘Tomiño Romano: o xacemento de Currás’ poderá visitarse ata o 11 de marzo de xoves a venres de 10.30 a 14.30 e de 16.30 a 20.30 horas. Hai ademais a posibilidade de abrir a mostra para grupos con visitas previamente concertadas.

Segue lendo

Tomiño, exemplar defensor do seu Patrimonio

O pasado sábado 25 de outubro, tal e como vos comentaba nunha entrada anterior, asistín á inauguración da interesante mostra "Tomiño Romano. O xacemento de Currás", que estará aberta na Casa da Cultura ata o vindeiro domingo 9 de novembro, todos os días de 11 a 14 e de 17 a 20 horas.

Este acto, organizado polo concello tomiñés, contou coa presenza -entre outros- de Salustiano Mato, reitor da Universidade de Vigo, a alcaldesa de Tomiño, Sandra González, as concelleiras de Cultura de Tomiño e Vila Nova de Cerveira, membros da comunidade de montes e da asociación veciñal de Currás, etc.

Non podían faltar, por suposto, os coordinadores do estudo e investigación, con Fermín Pérez Losada e Silvia González Soutelo ao fronte, que foron os encargados de explicar e guiar ao público asistente pola exposición.

O historiador Xoán Martínez Tamuxe, como xa indiquei en varias ocasións, foi convidado a Tomiño como o único "supervivente" do Equipo Arqueolóxico do Baixo Miño que descubriu esta vila e necrópole de Currás, en 1972. 

En palabras da alcaldesa, Sandra González, "dende o concello quixemos recoller o facho de luz que prenderon investigadores como Jesús Gómez Sobrino, Aquilino González Santiso e Xoán Martínez Tamuxe, cando hai máis de 40 anos, con máis vontade que recursos, levaron a cabo unha admirable escavación: a villa romana de Currás. A eles debémoslle a recuperación das vellas pedras que algún día foron a vivenda dun persoeiro destacado da tardorromanidade".

Durante a inauguración proxectouse un vídeo emitido no coñecido programa "Desde Galicia para el Mundo" e creáronse para a ocasión diferentes paneis explicativos, xunto coa propia mostra de material atopado nas distintas escavacións e pezas arqueolóxicas cedidas polo Museo Diocesano de Tui ou dos fondos do Laboratorio de Arqueoloxía da Universidade de Vigo.

Destacar a publicación dun catálogo editado polo Concello de Tomiño, con textos e imaxes dos propios Fermín e Silvia, xunto con Adolfo Fernández Fernández, Patricia Valle Abad, Manuel Xusto Rodríguez e Beatriz Comendador Rey.

Velaquí vos deixo a reportaxe fotográfica completa realizada por MIÑO FILMS.

Segue lendo

Expo "Tomiño romano. O xacemento de Currás"

Visitantes durante as últimas escavacións de 2013 na vila e necrópole de Currás

Este sábado 25 de outubro (19:00 horas) achegareime ata a Casa da Cultura de Tomiño para asistir á inauguración da Exposición Tomiño Romano. O xacemento de Currás, organizada por este Concello e pola Universidade de Vigo. 

Gómez Sobrino, González Santiso e Martínez Tamuxe en Currás (1972)

Como non, alí estará presente un convidado de luxo, o historiador rosaleiro Xoán Martínez Tamuxe, único "supervivente" do Equipo Arqueolóxico do Baixo Miño que descubriu esta vila e necrópole de Currás, en 1972.

Hai que lembrar, en palabras de Tamuxe, que nesta nova aventura investigadora e de escavacións que se proseguiu en 2013 "foi peza clave a historiadora e arqueóloga tudense, Silvia González Soutelo, coordinando o equipo técnico o profesor Fermín E. Pérez Losada, da Universidade de Vigo" (na imaxe, debaixo destas liñas).

Certamente son dignas de alabar e de imitar por outros municipios estas exemplares iniciativas do Concello de Tomiño en pro da cultura e da defensa do seu patrimonio. 

Máis información, aquí.

Segue lendo

EXPOSICIÓN DO XACEMENTO ARQUEOLÓXICO DOS MEDOS (CURRÁS, CONCELLO DE TOMIÑO)

O pasado sábado 9 de novembro asistín co meu pai, Xoán Martínez Tamuxe, a unha exposición guiada con material procedente do importante xacemento arqueolóxico dos Medos*, que tivo lugar na Casa da Comunidade de Montes de Currás (Tomiño).

Os encargados das correspondentes explicacións foron os propios directores das escavacións, os doutores en Arqueoloxía, Silvia González Soutelo e Fermín E. Pérez Losada.

A través de oito paneis e unha mesa con diferentes restos atopados nesta segunda campaña, os visitantes puideron coñecer e admirar a categoría desta vila romana de Currás.

Igualmente os asistentes tivemos a oportunidade de ver en primicia o estreo da gravación efectuada polo equipo de TV "Desde Galicia para el Mundo", onde apareceron tanto imaxes do traballo no propio xacemento, como entrevistas aos directores e ao único "supervivente" daquel descubridor "Equipo Arqueolóxico do Baixo Miño", Xoán Martínez Tamuxe.

Coincidindo coas festas patronais na honra de San Martiño, aparte desta mostra, celebrouse un obradoiro de coiro a cargo de Antonio Mesperuza, veciño de Currás.

Tamuxe (no centro), cos directores Silvia e Fermín

*O xacemento arqueolóxico dos Medos é unha vila romana e unha necrópole cristiá-visigótica descuberta en 1972 polo Equipo Arqueolóxico do Baixo Miño, integrado por Jesús Gómez Sobrino, Aquilino González Santiso e o propio Xoán Martínez Tamuxe.

Reportaxe fotográfica completa da exposición, aquí.

Segue lendo

VISITA ÁS ESCAVACIÓNS ARQUEOLÓXICAS DA VILA E NECRÓPOLE ROMANA DE CURRÁS

Este xoves 18 de xullo visitamos o xacemento arqueolóxico romano de Currás (Tomiño-Pontevedra), sen dúbida, un dos máis importantes da comarca do Baixo Miño.

Na actualidade, estase acometendo un proxecto de "recuperación e posta en valor, que xurde no verán de 2013 e está coordinado dende o Grupo de Estudios de Arqueoloxía, Antigüidade e Territorio da Universidade de Vigo baixo o patrocinio e colaboración do Concello de Tomiño e a Comunidade de Montes de Currás".

Lembramos que esta vila e necrópole foi descuberta en 1972 polo Equipo Arqueolóxico do Baixo Miño, integrado por Jesús Gómez Sobrino, Aquilino González Santiso (ambos xa falecidos) e o único "supervivente" hoxe en día, Xoán Martínez Tamuxe.

O equipo técnico que dirixe esta curta campaña arqueolóxica de xullo de 2013 en Currás está formado -entre outros- por Fermín E. Pérez Losada, Silvia González Soutelo, Martiño Xosé Vázquez Mato, Patricia Valle Abad, Begoña Garrido Labrador e Natalia Caparrini Marín.

O obxectivo desta intervención é a localización das antigas ruinas que se descubriron en 1972 para nun futuro seguir con novas campañas e coñecer tanto a extensión como novo material que facilite a datación desta vila e necrópole romana.

Velaquí vos deixo unha pequena reportaxe fotográfica desta visita.

Segue lendo