As Escritoras/es en Lingua Galega, a polo 2016

Asinando o libro dos Muíños do Folón, escrito na compaña de Xoán Martínez Tamuxe

Boas a todos/as!

Coméntovos nesta nova entrada, que a nosa activa Asociación de Escritoras e Escritores en Lingua Galega (AELG) "celebrou na mañá do sábado 13 de febreiro a súa Asemblea Xeral de socios/as, que acordou outorgar a Dolores Macías Pose, e a Mini e Mero os PremiosMestres/as da Memoria 2016, galardóns que se entregarán na I Gala dos Premios Mestres e Mestras da Memoria a celebrar en Lugo o 19 de marzo.

Tamén o nome do Escritor/a Galego/a Universal 2016, distinción que recollerá Pere Gimferrer na I Gala do Libro Galego que terá lugar o 14 de maio na cidade de Santiago de Compostela. 

Así mesmo, acordouse que Helena Villar Janeiro sexa a próxima “Escritora na súa Terra – Letra E” e, por tanto, quen reciba unha homenaxe que este ano chega á súa vixésimo segunda edición; será no mes de xuño no Concello de Rianxo.

Aprobouse o programa de actividades para o ano, que inclúe como a máis próxima a celebración do vindeiro Día de Rosalía de Castro; o programa aposta por continuar con actividades de traxectoria xa asentada e de alcance social como son os paseos literarios ou os obradoiros da escola de escritoras e escritores.

Tamén a organización ou corganización de xornadas de formación dirixidas ao estudo das diferentes formas de crear literatura contemporánea desde os espazos de formación de novos formadores/educadores/mediadores da lectura. Igualmente se reforza o proxecto coordinado pola sección de Literatura Oral coa celebración dunha gala dos premios mestres e mestras da memoria e a través da celebración de novas polafías e dunha nova edición, a novena, da xornada de literatura de tradición oral.

Asemade, a visibilidade da escritora e do escritor a través da web continuará a ser un eixo central da actuación da entidade co enriquecemento do espazo común e mais de cada páxina individual con que cada socia/o conta no centro de documentación da web da aelg.

Tamén se acordou a incorporación de tres novas vogalías ao Consello Directivo da AELG, as de Ledicia Costas por Vigo, Ramiro Torres como responsábel de comunicación, e mais Afonso Becerra como vogal de literatura dramática.

Anunciouse a creación dunha Sección de Literatura Dramática e confirmouse a participación activa da AELG na plataforma Seguir creando".

Por certo, teño que agradecer e lembrar antes de rematar este post, que en marzo deste 2016 fará un ano que dende a Asociación de Escritoras/es en Lingua Galega me elixiran "Autor da semana" no facebook. Prometo, pois, seguir traballando e escribindo en prol da nosa cultura, do noso patrimonio e das nosas xentes. 

¡Ata a próxima! ¡Saúde para todos/as! ¡Bicos e apertas!

Segue lendo

"Tomiño Romano" inaugúrase en Compostela

Segundo se pode ler na web da Universidade de Santiago de Compostela, mañá xoves 4 de febreiro, inaugúrase na Igrexa da USC a exposición "Tomiño Romano: o xacemento de Currás", resultado da primeira fase dos traballos arqueolóxicos realizados en 2013.

Gómez Sobrino, González Santiso e Martínez Tamuxe en Currás (1972)

Hai que lembrar que esta vila romana dos Medos, en San Martiño de Currás, no concello de Tomiño (Pontevedra) foi descuberta en 1972 polo Equipo Arqueolóxico do Baixo Miño, formado por Jesús Gómez Sobrino, Aquilino González Santiso e Xoán Martínez Tamuxe.

Os resultados daquela campaña de 1972: descubrimento da vila co seu hipocausto (sistema romano de calefacción) e a súa necrópole (cemiterio primitivo, xa cristiano) foron recollidos en parte na prensa e, singularmente, na memoria das mesmas publicada na revista Tuy - Museo y Archivo Histórico Diocesano. I (Tui, 1975).

Tras a exposición á que asistimos na Casa de Cultura de Tomiño en outubro de 2014 é agora a quenda da inauguración desta mostra en Santiago de Compostela, ás 13.00 horas "nun acto no que participarán a vicerreitora de  Estudantes, Cultura e Responsabilidade Social, Dolores Álvarez; a concelleira de Cultura e Asuntos Sociais de Tomiño, Cristina Martínez; os comisarios da mostra, Fermín Pérez e Silvia González; o decano da Facultade de Xeografía e Historia da USC, Juan Monterroso; e a decana da de Historia da UVigo, Susana Reboreda". 

Lémbrase dende a Universidade de Santiago que a mostra ‘Tomiño Romano: o xacemento de Currás’ poderá visitarse ata o 11 de marzo de xoves a venres de 10.30 a 14.30 e de 16.30 a 20.30 horas. Hai ademais a posibilidade de abrir a mostra para grupos con visitas previamente concertadas.

Segue lendo

Julio Sesto, o escritor máis ilustre de O Rosal

Debuxo de Florindo Álvarez Martínez

Quero comezar este ano 2016 lembrando a figura de Julio Sesto, o máis ilustre escritor na historia da nosa vila. Para isto temos que consultar, inevitablemente, a súa biografía publicada na Gran Enciclopedia Gallega e realizada polo investigador -tamén rosaleiro- Xoán Martínez Tamuxe.

Transcribimos e traducimos ao galego o que alí se di do noso escritor máis universal:

"Julio Sesto naceu no Rosal (Pontevedra) o 10 de xullo de 1879 e faleceu en San Ángel (México) o 5 de maio de 1960. 

Seudónimo literario do escritor e poeta Julio Manuel Vicente Sesto. En 1895 emigra a Puerto Rico, onde amplía os seus estudos e en 1897 parte para México, país no que fixa a súa residencia dende 1901, comezando a súa etapa literario-xornalística no diario El Imparcial e continuándoa en El Correo Español e o Diario del Hogar. 

Salta á fama en 1909 coa publicación no Diario de la Marina, da Habana, do poema Las Abandonadas. Durante a súa estadía en España (1911) foi redactor de El Liberal e colaborador de Blanco y Negro, Nuevo Mundo e Ilustración Española y Americana, entre otros. 

A partir de 1917 abandona o xornalismo para dedicarse ao seu labor como escritor, que vai dende a investigación á poesía, dende o teatro á socioloxía, pasando pola historia e a biografía, sendo, ademais, un destacado conferenciante.

Ante a notoria personalidade de Julio Sesto, o hispanista Paravicini, primeiro (1917), como logo (1920) Alfonso Caravioto e José Vasconcelos, nomeáronlle profesor de Literatura e Lengua castelás na Universidade Nacional de México, cargo do que Sesto dimitiu poucos anos despois.

En determinado momento político actuou como “intermediario diplomático” en diferentes cuestións entre España e México, cuxas diferenzas e alonxamento lamentou sempre o escritor.

Julio Sesto fundou en 1971, e tamén dirixiu, a revista ilustrada Tricolor, e catro anos antes creara a importante editorial “El Libro Español S.A.”, na que só se publicaban libros en castelán.

A súa obra literaria está representada por máis de 25 títulos publicados en México e España, aparte dunhas 10 obras inéditas. 

Das súas publicacións é obrigado destacar:

-Ensayos:  

El Pensamiento en América, 4 vol.

Psicología Amorosa

El México de Porfirio Díaz

La Bohemia de la muerte

Las Abejas del Rosal

-Poesía: 

Azulejos (México, 3ª ed., 1942)

Cactus (id., 1921)

Cálices (id., 1940)

El libro que canta  (íd, 1949)

O libriño da ialma (Vigo, 1958)

-Novela: 

La tórtola del Ajusto (México, 4ª ed., 1951)

La casa de las Bugambilias (Barcelona, 4ª ed., 1947)

Cómo ardían los muertos (México, 1955)

La Sangre de España (íd., 1937)

La ciudad de los Palacios (íd. 1958)         

La emperatriz morena (íd. 1957)

Las Abandonadas (íf., 1908)

La Reina de Acapulco (íd. 1935)

Mamacita linda…! (íd. 1927)

Julio Sesto preparaba as súas memorias, cuxa primicia adiantara xa, a través de publicacións na prensa, baixo o título de Las colaboraciones, cando se quitou a vida na súa finca de San Ángel (México). Varias das súas obras foron levadas ao cine". 

Hai que destacar que o Concello do Rosal homenaxeou a Julio Sesto en 1979 coa erección dun monumento na súa honra (obra de Xoán Piñeiro) no centenario do seu nacemento, dedicándolle unha rúa que aínda conserva o seu nome na actualidade.

Cónstanos que Xoán Martínez Tamuxe está ultimando -entre outros traballos- unha ampla biografía de Julio Sesto, en forma de libro, que está á espera de patrocinio para poder ser publicada.

Segue lendo

Un gran petróglifo e unha ruta digna de admirar

O pasado sábado 12 de decembro, de mañá, asistín á presentación oficial do recén recuperado Petróglifo de Ghorghalado, sito na parroquia rosaleira de San Bartolomeu das Eiras.

Nesta primeira visita, despois da restauración e intervención sobre os gravados por parte dos correspondentes organismos, convidados polo Concello do Rosal, achegueime co meu pai, o historiador e arqueólogo Xoán Martínez Tamuxe.

Xa de tarde, na andaina organizada tamén polo Concello e dirixida por Antonio Castro Rozados, con paseo á capela da Madanela pola súa fermosa senda, cunhas paisaxes dignas de admirar, fun na compaña do amigo escultor da vila, Julio Martínez Martínez.

A partir de agora vén, quizais o máis difícil, o mantemento deste patrimonio. Agardemos que a conservación, limpeza e o civismo da xente que o visita, estea á altura do descubrimento e da actuación levada a cabo. 

Hai que ter fe en que si, xa que non cabe dúbida que é unha importante parte da nosa cultura, das nosas raíces. Dende aquí, noraboa a todos/as que o fixeron posible.

Reportaxe fotográfica completa desta xornada realizada por Infomiño.

Segue lendo

O Cabaqueiro. A valiosa tradición de Neira Vilas

Antes de que remate o 2015 fago esta pequena crónica sobre a última publicación de Xoán Martínez Tamuxe, a "Memoria da XXVII Festa do Cabaqueiro", editada recentemente pola delegación de Cultura do Rosal e que conta coa miña colaboración no apartado fotográfico e na tarefa de informatización dos seus correspondentes textos.

Tal e como lembro na última entrada, ata o propio Xosé Neira Vilas alabou esta Festa e Memoria do Cabaqueiro, nas súas palabras "tradición moi valiosa e moi identificada coa comarca", que nesta ocasión comeza cunhas verbas de despedida do seu coordinador, Tamuxe, e que desta maneira dá por rematada unha tarefa que comezou en 1987.

Nesta nova memoria, que se pode adquirir en dependencias municipais, realízase -entre outras- unha crónica da XXVII Festa 2014, co pregón íntegro incluído do químico rosaleiro, Manuel Dorado González.

Igualmente, ofrece interesantes artigos de investigación como os "Cabaqueiros do Rosal na telleira de Benza (Trazo-A Coruña)", ou mesmo unha "Reseña histórica da telleira da Cumieira ou de Narillo".

Segue lendo

Entrevista a Xoán M. Tamuxe no Faro de Vigo

O xornal Faro de Vigo, diario decano da prensa nacional, publica hoxe, domingo 11 de outubro, unha entrevista ao meu pai, o escritor Xoán Martínez Tamuxe, tanto na súa edición dixital como na impresa. 

Asinada pola correspondente do Baixo Miño, Eva González, e con fotografía da miña autoría, a noticia do recoñecemento que mañá o Concello do Rosal lle tributará na XXVIII Festa do Cabaqueiro é a principal da Comarca.

Segue lendo

Programa da Festa do Cabaqueiro. O Rosal, 2015

O Rosal celebrará dende o 10 ao 12 de outubro a XXVIII edición da Festa ou Romancha do Cabaqueiro, que coincide anualmente coas Festas da Pilarica.

Tal e como se pode ler no cartel anunciador este será o programa de festexos:

SÁBADO 10 

Baile e música tradicional da bisbarra. A partir das 7 da tarde, organizado polo grupo Do lusco ó fusco con motivo do seu 30 aniversario, no Auditorio Municipal.

DOMINGO 11

Obradoiros para nenos e nenas a partir das 5 da tarde. Ás 22:00 horas, actuación do grupo folk Can de Palleiro na Praza do Calvario (en caso de mal tempo a actuación será no Auditorio Municipal).

LUNS 12

Misa solemne cantada pola Coral da Agrupación Musical do Rosal. A partir das 17:30 horas terá lugar a celebración da XXVIII Festa de lembranza "Os Cabaqueiros" que comezará cun recoñecemento a Xoán Martínez Tamuxe pola súa labor historiadora e investigadora da nosa cultura e coa lectura do pregón a cargo de Antonio Giráldez Lomba, docente e historiador vigués.

Foto: facebook Lirolai

A partir das 19:00 horas, música tradicional co grupo Lirolai e a continuación concerto da Banda da Agrupación Musical do Rosal.

Durante todo o día haberá demostración de oficios tradicionais: palilleiras, cesteiro, tamanqueiro, canteiro...

Igualmente haberá unha exposición de pintura na Sala de exposicións do Concello de Valentín Marín Rodríguez.

Segue lendo

Artigo sobre gravados rupestres en "Soberosum"

Escritores/as, alcalde e concelleiro de Cultura de Ponteareas na presentación. (Foto: Hernández)

Onte, mércores 10 de xuño, fun novamente convidado polo Concello de Ponteareas, desta vez para asistir á presentación de "Soberosum". Revista de Estudos Municipais, na que colaborei literariamente, xunto con Xoán Martínez Tamuxe, co artigo de carácter arqueolóxico titulado "Algúns gravados rupestres en Mouriscados e Uma".

Un pracer e unha honra poder escribir e aportar o meu -o noso- graniño de area a esta publicación ponteareá (a nº 4, de case 400 páxinas), que tamén conta coa firma de recoñecidos investigadores como -entre outros- Clodio González Pérez, Andrés Sampedro Fernández, Estanislao Fernández de la Cigoña Núñez, Francisco Candeira Mosquera, Michael Skinner, etc, etc.

O que digo sempre e me reafirmo cada vez máis: cando "fóra" contan contigo, te tratan de forma exquisita e te invitan a colaborar en libros e revistas desta categoría, un sae deste tipo de actos botando de menos un pouco máis de sensibilidade cultural e respecto preto da casa. 

Está claro que, cando hai interese polo noso, querer é poder. Pero -como di o refrán- de onde non hai... ( )

¡Noraboa ao Concello de Ponteareas!

Segue lendo

Ponteareas defende e difunde o seu patrimonio

Información e fotografías: Concello de Ponteareas

O venres 29 de maio fun convidado polo Concello de Ponteareas ao II Encontro de escritores en lingua galega de temática ponteareá, baixo o lema “A importancia de difundir o local”, que se celebrou no Salón de sesións municipal.

Ademais o convite foi extensivo á presentación da revista internacional Pregón da que colaborei literariamente co artigo titulado "Un ponteareán, autor do monumento a Frei Rosendo Salvado", dedicado ao mestre escultor Alfonso Quinteiro Alonso.

Segundo se pode ler na súa web: "Foi unha xuntanza na que se tratou a importancia que ten para a cultura local a súa divulgación escrita e no que participaron os escritores Clodio González Pérez, Anxo Serafín Porto Ucha, Xoán Martínez Tamuxe, Estanislao Fernández de la Cigoña, Antonio José Groba Diéguez e Sofía Rodríguez Suárez". 

Intervención do escritor rosaleiro Xoán Martínez Tamuxe

Andrés Sampedro Fernández, concelleiro de Cultura do Concello de Ponteareas, "actuou como moderador do debate". O encontro tamén serviu "para brindar unha homenaxe, a título póstumo, a Maruja Pino Piñeiro polo seu seu labor como escritora e divulgadora da nosa cultura, costumes e tradicións".

Un acto moi emotivo -seguimos lendo- que "contou coa presenza da súa filla, Margot, quen recibiu un diploma e unha medalla de parte dos escritores, ademais dun agasallo de mans do alcalde, Salvador González Solla, en nome do Concello". 

Posteriormente, o mesmo salón foi testemuña da presentación da revista Pregón, publicación do Concello de Ponteareas, "que recolle ano tras ano artigos referentes ao Corpus, convertíndose nunha referencia escrita e visual de todas as alfombras confeccionadas o ano anterior e que ten unha ampla difusión non só en Galicia e España, senón tamén alén das nosas fronteiras, como en Uruguai, Arxentina, Cuba, Venezuela, México, etc, onde os nosos ponteareáns que están fóra a gardan ano tras ano como un prezado tesouro". 

O concelleiro de Cultura, Andrés Sampedro Fernández, sinalou a "importancia de escribir e investigar sobre a cultura local". O edil definiu a revista Pregón, ou Revista da Festa do Corpus Christi de Ponteareas, como "unha publicación importantísima para o espallamento da nosa festa do Corpus e, asemade, unha excelente canle de difusión onde estudosos de renome poden plasmar as súas investigacións sobre o Corpus, Ponteareas e a súa comarca, contribuíndo, pois, á difusión de todo tipo de estudos de temática local".

Segue lendo

Presentación para a historia na Illa de San Simón

O pasado sábado 16 de maio fun convidado na Illa de San Simón (Redondela) á presentación do libro As Telleiras de Cesantes, da autoría de María José Cabaleiro Casal e José Manuel Bouzón Pintos. 

Sen dúbida, a illa "excepcional e paradisíaco enclave situado na enseada que conforma o fondo da ría de Vigo" acolleu un fermoso percorrido pola historia deste oficio na parroquia redondelá, dende finais do século XVIII ata principios do s. XX.

A publicación, que está editada polo Obradoiro de Estudos Locais Fernando Monroy, foi presentada polo historiador e arqueólogo Xosé Lois Vilar Pedreira, quen -coa súa acostumada, simpática e gran oratoria- encandilou ás máis de 200 persoas que acudiron ao acto.

Entre os asistentes, como non, o escritor e investigador rosaleiro, Xoán Martínez Tamuxe, un dos grandes protagonistas da presentación e do libro, xunto co lembrado cabaqueiro, xa finado, Manuel Rodríguez "Trintiña".

Un pracer poder saudar, igualmente, despois de moitos anos a Xurxo Constela, con quen tiven o pracer de traballar na empresa de arqueoloxía Anta de Moura. Hoxe en día, Xurxo é o coordinador de A Citania.

Vaian tomando boa nota algunhas institucións públicas e privadas, concellos e asociacións. Como afirmou Vilar na súa intervención "non fai falta gastar millóns de euros" para protexer e divulgar o noso rico patrimonio histórico-cultural, tan só ollos e querer facer as cousas ben. 

Dende aquí, o meu agradecemento polo convite e os meus parabéns a María José, a Bouzón e a todos os que forman o Obradoiro de Estudos Locais Fernando Monroy polo seu formidable traballo.

Segue lendo

O documental dos Muíños, en La Voz de Galicia

Dende aquí, o meu agradecemento á xornalista Begoña R. Sotelino, que onte, domingo 15 de marzo, publicaba en La Voz de Galicia -tanto na súa edición impresa como na dixital- unha reportaxe sobre o Documental dos Muíños do Folón-Picón, que estamos realizando Cristóbal Coímbra e máis eu coa nosa produtora audiovisual Miño Films.

Teño que confesar que, por culpa do meu cacharro de móbil -que como algúns sabedes, ultimamente "se entrecorta" ou escoitáse como "se estivese nunha caverna"- houbo algunha dificultade de son e certas partes da conversa ou entrevista telefónica non se corresponden exactamente, ao 100%, coa realidade do que se quería expresar, pero bueno, é o de menos.

Como se di no artigo son "licenciado", pero en "amor por O Rosal"; en vez de deportistas que hacen "rafting" a modalidade correcta que se quería comunicar é "rápel"; o de "miles de rutas..." serían as veces que eu subín, sendo centos as guiadas; ou que os Muíños foron declarados Ben de Interese Cultural en 1998 e non en 2003 (sendo nesta data o Premio Agader ao Embelecemento ao Medio Rural).

En verdade, nas declaracións a La Voz de Galicia, non podo negar a miña crecente e fervente devoción polos Muíños e o seu sendeiro: "siempre ha sido una ruta mágica para mí", facendo fincapé a xornalista en que "este año se cumple una década desde que comenzó a mostrar a los visitantes ese entorno y coincidiendo con ese décimo aniversario, tras incontables visitas conociendo palmo a palmo el recorrido, decidió elaborar algo más duradero que una charla a pie de monte que se lleva el viento". 

Lembra Begoña Sotelino que o documental se atopa na plataforma de Verkami: "El proyecto cuenta con colaboración del Concello do Rosal y de la Comunidad de Montes de Santa Mariña (ademais de O.L.V.R., e Activa Dixital), pero para redondear el presupuesto de la producción, el equipo solicita a los internautas 1.000 euros que se pueden donar en aportaciones desde 10 hasta 100 euros. Quedan 22 días de plazo para hacerlo y a cambio, el colaborador consigue diferentes recompensas, que van desde el agradecimiento en los créditos finales hasta camisetas, deuvedés, cenas para dos personas, rutas guiadas por los molinos y reserva de butaca doble en su estreno".

A autora do artigo recalca que "en el 2009 se publicó el libro Os muíños do Folón e do Picón na vila do Rosal. Conxunto histórico-etnográfico de Galicia, que escribió con su padre y el siguiente paso en este proceso ha sido poner voz e imágenes a un enclave que marcó a esta familia".

Remato esta entrada convidándovos a que lle botedes un vistazo á noticia completa en La Voz de Galicia. Graciñas de novo Begoña por ter contactado con nós e por suposto, por esta túa crónica da rodaxe do documental sobre os nosos queridos muíños do Folón-Picón.

¡Bicos e apertas!

Segue lendo

Conferencia de Xoán M. Tamuxe en Os Seixiños

Este xoves 13 de novembro ás 20:00 horas, o meu pai, Xoán Martínez Tamuxe ofrecerá no Bodegón Os Seixiños unha conferencia sobre "A prehistoria entre A Gándara e Salcidos (A Guarda)".

Autor do libro Parroquia de San Lorenzo de Salcidos. Aproximación histórica, Tamuxe presentará de novo esta publicación, comezando por explicar a toponimia e a etimoloxía local (¿cal é a orixe do nome Seixiños, A Gándara ou Salcidos?). 

Igualmente coñeceremos os gravados rupestres, os vestixios da cultura castrexa ou a romanización que sufriu esta zona do Baixo Miño. Para isto, haberá unha mostra de material prehistórico e unha proxección de imaxes de xacementos arqueolóxicos.

Esta conferencia é a primeira dunhas xornadas socioculturais que se celebrarán nos vindeiros meses con motivo do I aniversario da inauguración do Bodegón Os Seixiños, que dirixe o amigo Sergio Rodríguez "Trinta".

Dende aquí, anímovos a que non vos perdades esta, a bo seguro, animada e interesante conferencia.

¡Vémonos mañá! ¡Bicos e apertas!

Segue lendo

Tomiño, exemplar defensor do seu Patrimonio

O pasado sábado 25 de outubro, tal e como vos comentaba nunha entrada anterior, asistín á inauguración da interesante mostra "Tomiño Romano. O xacemento de Currás", que estará aberta na Casa da Cultura ata o vindeiro domingo 9 de novembro, todos os días de 11 a 14 e de 17 a 20 horas.

Este acto, organizado polo concello tomiñés, contou coa presenza -entre outros- de Salustiano Mato, reitor da Universidade de Vigo, a alcaldesa de Tomiño, Sandra González, as concelleiras de Cultura de Tomiño e Vila Nova de Cerveira, membros da comunidade de montes e da asociación veciñal de Currás, etc.

Non podían faltar, por suposto, os coordinadores do estudo e investigación, con Fermín Pérez Losada e Silvia González Soutelo ao fronte, que foron os encargados de explicar e guiar ao público asistente pola exposición.

O historiador Xoán Martínez Tamuxe, como xa indiquei en varias ocasións, foi convidado a Tomiño como o único "supervivente" do Equipo Arqueolóxico do Baixo Miño que descubriu esta vila e necrópole de Currás, en 1972. 

En palabras da alcaldesa, Sandra González, "dende o concello quixemos recoller o facho de luz que prenderon investigadores como Jesús Gómez Sobrino, Aquilino González Santiso e Xoán Martínez Tamuxe, cando hai máis de 40 anos, con máis vontade que recursos, levaron a cabo unha admirable escavación: a villa romana de Currás. A eles debémoslle a recuperación das vellas pedras que algún día foron a vivenda dun persoeiro destacado da tardorromanidade".

Durante a inauguración proxectouse un vídeo emitido no coñecido programa "Desde Galicia para el Mundo" e creáronse para a ocasión diferentes paneis explicativos, xunto coa propia mostra de material atopado nas distintas escavacións e pezas arqueolóxicas cedidas polo Museo Diocesano de Tui ou dos fondos do Laboratorio de Arqueoloxía da Universidade de Vigo.

Destacar a publicación dun catálogo editado polo Concello de Tomiño, con textos e imaxes dos propios Fermín e Silvia, xunto con Adolfo Fernández Fernández, Patricia Valle Abad, Manuel Xusto Rodríguez e Beatriz Comendador Rey.

Velaquí vos deixo a reportaxe fotográfica completa realizada por MIÑO FILMS.

Segue lendo